^* -ad/ ^UV

Sufikso esprimanta ĝenerale la agon kaj uzata por derivi:

A.

substantivojn:

1.

el substantiva radiko por signifi agon faritan per la ilo montrata de la radiko: brosado; martelado [1]; telefonado [2]; kronado [3]; afiŝado [4].

Rim. 1: La responda verbo estas sensufikse derivata de la substantivo: „marteli“ (ne: „marteladi“), „kroni“ ktp.

2.

el verba radiko por signifi:

a)

ĝeneralan kaj abstraktan ideon de la ago esprimata de la radiko: la uzado de la artikolo estas tia sama, kiel en aliaj lingvoj [5] (Kp „la uzo de l' artikolo en tiu okazo ne estas ĝusta“); oni aŭdis muzikon kaj kantadon [6]; la ŝtelado estas via profesio [7]; mia profesio estas repagado, — venĝado estas mia metio [8]; kvar junaj viroj [prezentis] ĉiajn poziciojn de homa korpo: staradon, iradon, saltadon, kliniĝadon al ĉiuj flankoj, […] disdonadon de salutoj de ĉiuj signifoj kaj mezuroj, plenumadon de plej diversaj gestoj per plej diversaj movoj ^Marta ; la natura irado de la aferoj [9].

Rim. 2: Pro ĉi tiu senco -ad servas por nomi la artojn, kapablojn ktp: la kantado estas tre agrabla okupo [10] (ne: „okupado“, ĉar temas ne pri daŭra kanto, sed pri la scipovo kanti); la pentrado.

b)

longdaŭrecon aŭ ripetiĝon de la ago esprimata de la radiko: lia hieraŭa parolo estis tre bela, sed la tro multa parolado lacigis lin [11]; la pafado daŭris tre longe[12]; parolado (oratoraĵo) elokventa; malriĉigas ne nehavado, sed tro granda dezirado ^PrV ; donado de almozoj neniam malriĉigas ^PrV .

B.

verbojn:

3.

el verbaj aŭ substantivaj radikoj, por prezenti la agon en sia malvolviĝo kaj insisti pri ties daŭro aŭ ripetiĝo: ili vizitadis ŝin ĉiun nokton [13]; li priverŝadis [la floron] kaj vartadis ĝin kaj zorgadis pri tio, ke ĝi ricevu plene ĉiun sunradion [14]; aŭskultante sian koron marteladi […] en la brusto [15]; mi saltadis la tutan tagon de loko al loko [16]; li kuradis ĝis li falis [17]; ĉiun tagon tien venadas multaj fremduloj [18]; la unuaj esperantistoj pacience elmetadis sin ne sola al konstanta mokado, sed eĉ al grandaj oferoj [19]; kvazaŭ miloj da ponardoj […] traflugadis la cerbon, pikadis la tempiojn kaj faladis per siaj pintoj sur la fundon de la brusto ^Marta ; la mastrino […] renkontadis ŝin ĉiam ĝentile ^Marta ; riĉigadi la lingvon per novaj vortoj [20]; ofte kunvenadi por komunaj interparoladoj [21]. re-²

Rim. 3: Tiu ĉi formo servas por traduki la imperfekton de la latinidaj lingvoj.

Rim. 4: Kelkaj esperantistoj uzas -ad kiel memstaran vorteron: vi adis defraŭdi abundon […] el la reĝa provizejo [22]; mi tiel ade praktikas la idiotecon, kvazaŭ mi estus profesia idioto [23]; s-ro Lipman daŭrigis sian prelegon longe kaj enuige, ade ripetante [24]; la termosbotelo interrompis sian adan movon al la buŝo [25].

-aĉ, -ar, -eg, -et, -ul, ktp